ભરૂચમાં મંદિર ચોરીના ગુનામાં છેલ્લા 7 વર્ષથી વોન્ટેડ ‘કાયદાના સંઘર્ષમાં આવેલા કિશોર’ને SOG ટીમે ઝડપી પાડ્યો

ભરૂચ જિલ્લા પોલીસની સ્પેશિયલ ઓપરેશન ગૃપ (SOG) ટીમે સાત વર્ષ જૂના ચોરીના ગુનામાં મોટી સફળતા મેળવી છે. ભરૂચ શહેરના “એ” ડિવિઝન પોલીસ સ્ટેશન વિસ્તારમાં થયેલી મંદિર ચોરીના ગુનામાં છેલ્લા સાત વર્ષથી નાસતા ફરતા એક કાયદાના સંઘર્ષમાં આવેલા બાળકને SOG ટીમે બાતમીના આધારે ઝડપી પાડ્યો છે.

​વડોદરા વિભાગના પોલીસ મહાનિરીક્ષક સંદીપસિંહ અને ભરૂચ જિલ્લા પોલીસ અધિક્ષક અક્ષય રાજ દ્વારા જિલ્લામાં કાયદો અને વ્યવસ્થા જાળવવા તેમજ નાસતા ફરતા આરોપીઓને પકડી પાડવા માટે ખાસ સૂચના આપવામાં આવી હતી. આ માર્ગદર્શન હેઠળ SOG ના પોલીસ ઈન્સ્પેક્ટર એ.વી. પાણમીયા અને એ.એચ. છૈયાની રાહબરીમાં પોલીસ ટીમ વોચમાં હતી.

​દરમિયાન, SOG ટીમને ચોક્કસ બાતમી મળી હતી કે મંદિર ચોરીના ગુનામાં વોન્ટેડ કિશોર હાલ તેના ઘરે તેના ભાઈ સાથે હાજર છે અને તેણે કાળા કલરનો શર્ટ તથા આછા પોપટી કલરનું નાઈટ પેન્ટ પહેરેલું છે. આ બાતમીની ખરાઈ કરીને પોલીસે દરોડો પાડતા તે કિશોર તેના ભાઈ સાથે મળી આવ્યો હતો.

​ઉલ્લેખનીય છે કે, આ કિશોર સામે વર્ષ 2018માં ભરૂચ શહેર “એ” ડિવિઝન પોલીસ સ્ટેશનમાં ગુના રજીસ્ટર નંબર 110/2018 હેઠળ ઈ.પી.કો. કલમ 457, 380 અને 114 મુજબ ચોરીનો ગુનો નોંધાયો હતો. પોલીસે હાલ આ કાયદાના સંઘર્ષમાં આવેલા બાળકનો કબજો મેળવી તેને આગળની કાર્યવાહી માટે ભરૂચ શહેર “એ” ડિવિઝન પોલીસ સ્ટેશનને સોંપ્યો છે.

​આ કામગીરીમાં SOG પી.આઈ. એ.વી. પાણમીયા સાથે એ.એસ.આઈ. રાજેન્દ્રભાઈ નાથાભાઈ, અ.હે.કો. કિર્તીકુમાર ભાર્ગવકુમાર અને અ.હે.કો. નરેશભાઈ અંબારામભાઈ જોડાયા હતા.