દસ વર્ષથી ફરાર ચોરીના આરોપીને નેપાળ બોર્ડર નજીકથી ઝડપી પાડતી ભરૂચ પેરોલ ફર્લો સ્કોડ
ભરૂચ પેરોલ ફર્લો સ્કોડે એક મોટી સફળતા મેળવી છે. ટીમે દસ વર્ષથી ફરાર ચોરીના આરોપીને નેપાળ બોર્ડર નજીકથી ઝડપી પાડ્યો છે. આરોપી અલ્તાફખાન બાદશાહખાન પઠાણ અંકલેશ્વર જીઆઈડીસી પોલીસ સ્ટેશનમાં નોંધાયેલા ચોરીના કેસમાં વોન્ટેડ હતો.
ભરૂચ જિલ્લા પોલીસ વડા મયુર ચાવડાએ પેરોલ અને ફર્લો જંપ કરનારા આરોપીઓ વિરુદ્ધ વિશેષ અભિયાન શરૂ કર્યું હતું. પીઆઈ એ.કે.જાડેજાના માર્ગદર્શન હેઠળ પેરોલ ફર્લો સ્કોડની ટીમે આરોપીની શોધખોળ શરૂ કરી. ટીમે ઉત્તર પ્રદેશમાં જઈને તપાસ કરી. ખાનગી બાતમીદારો, માનવ સ્ત્રોત અને ટેકનિકલ સર્વેલન્સની મદદથી આરોપીની માહિતી મેળવી. આ પછી ટીમે ઉત્તર પ્રદેશના બલરામપુર જિલ્લાના ઉતરોલા ગામમાંથી અલ્તાફખાન પઠાણની ધરપકડ કરી.
પકડાયેલા આરોપીને ભરૂચ લાવવામાં આવ્યો છે. તેને અંકલેશ્વર જીઆઈડીસી પોલીસ સ્ટેશનને સોંપી દેવામાં આવ્યો છે. પોલીસે આરોપી વિરુદ્ધ કાયદેસરની કાર્યવાહી શરૂ કરી છે.
