ભરૂચમાં ઐતિહાસિક ઓપરેશન: પોલીસ SOGએ જિલ્લામાં સૌપ્રથમ Hybrid ગાંજાના કારોબારનો કર્યો પર્દાફાશ; રૂ. ૨.૭૦ લાખનો માલ જપ્ત!

ભરૂચ જિલ્લાના યુવાધનને બચાવવાના ઉદ્દેશ સાથે પોલીસ વિભાગ દ્વારા ચલાવવામાં આવી રહેલા ‘નો ડ્રગ્સ ઇન ભરૂચ કેમ્પેઇન’ અંતર્ગત, ભરૂચ સ્પેશિયલ ઓપરેશન ગ્રુપ (SOG)ને માદક પદાર્થોના નેટવર્ક પર નિર્ણાયક પ્રહાર કરવામાં મોટી સફળતા મળી છે. SOG દ્વારા જિલ્લામાં અત્યાર સુધીમાં ન પકડાયેલો Hybrid ગાંજાનો જથ્થો ઝડપી પાડવામાં આવ્યો છે, જે આ ઝુંબેશની સૌથી મોટી સિદ્ધિ ગણાય છે.

પોલીસ મહાનિરીક્ષકશ્રી સંદીપસિંહ (વડોદરા વિભાગ) અને ભરૂચ પોલીસ અધિક્ષકશ્રી અક્ષય રાજના સઘન માર્ગદર્શન હેઠળ, SOG પી.આઈ. એ.એ. ચૌધરી અને એ.એચ. છૈયાના નેતૃત્વમાં ટીમોએ કામગીરી હાથ ધરી હતી. SOG શાખાના એ.એસ.આઇ. જયેન્દ્રસિંહ મહોબતસિંહને મળેલી ગુપ્ત બાતમીના આધારે, રાજપીપળા ચોકડી નજીક વોચ ગોઠવવામાં આવી હતી.

વોચ દરમિયાન, મેટ બ્લેક કલરના એક્ટિવા (નં. GJ-16-DA-7754) પર સવાર મુખ્ય આરોપી આકાશ શ્રીરામ યાદવ (ઉ.વ.૨૬, રહે. અંકલેશ્વર)ને રંગેહાથ ઝડપી લેવાયો હતો. તેની પૂછપરછમાં તેણે કબૂલ્યું કે તે આ ઘાતક નશીલો જથ્થો વિવેક રાજકુમાર ચૌહાણ (ઉ.વ.૨૩, રહે. ભરૂચ) પાસેથી લાવીને પોતાના આર્થિક લાભ માટે વેચતો હતો. SOGએ ત્વરિત કાર્યવાહી કરીને બંને આરોપીઓની ધરપકડ કરી હતી.

આ સંદર્ભે, અંકલેશ્વર GIDC પોલીસ સ્ટેશનમાં બન્ને આરોપીઓ વિરૂધ્ધ નાર્કોટિકસ ડ્રગ્સ એન્ડ સાઇકોટ્રોપીક સબસ્ટંસ એકટ ૧૯૮૫ (NDPS Act) ની કલમ-૮(c),૨૦[b{ii(A)}], ૨૫, ૨૯ મુજબ કડક કાર્યવાહી સાથે ગુનો નોંધવામાં આવ્યો છે. ભરૂચ SOGની આ સફળતાએ જિલ્લામાં ડ્રગ્સના વેપારીઓને સ્પષ્ટ સંદેશ આપ્યો છે કે કાયદાના હાથ લાંબા છે અને તેઓને કોઈ પણ ભોગે બક્ષવામાં આવશે નહીં.